Cysylltiadau Rhyngwladol a'r Cyfryngau

Pam dewis BA Cysylltiadau Rhyngwladol a'r Cyfryngau ym Mhrifysgol Aberystwyth?

• Mae'r radd Gwleidyddiaeth Ryngwladol a’r Cyfryngau yn cyfuno dau faes cyffrous iawn a byddwch yn cael eich dysgu mewn dwy adran ddeinamig gan staff sy'n weithgar ym maes ymchwil ar lefel ryngwladol.
• Yn y modiwlau gwleidyddiaeth rhyngwladol byddwch yn trafod y syniadau sy’n sail i’n bywydau o ddydd i ddydd, megis cyfiawnder, rhyddid, grym, cymuned, cydraddoldeb a dinasyddiaeth, a gwneir hynny wrth astudio ystod eang o wledydd a sefyllfaoedd. Byddwch hefyd yn edrych yn fanwl ar waith a phatrymau llywodraeth, ac yn bwysicach fyth, ar ganlyniadau’r gwaith a’r patrymau rheiny. Byddwch yn dysgu am wleidyddion a llywodraethau, ond hefyd am y grwpiau a mudiadau eraill sy’n dylanwadu ar fywyd gwleidyddol.
• Yn y themâu sy'n ymwneud â'r Cyfryngau bydd cydbwysedd rhwng profiad beirniadol a chreadigol. Byddwch yn astudio egwyddorion a sgiliau pob cam o'r broses gynhyrchu, o'r sgriptio i'r golygu, y dulliau cyfoes o greu ffilmau a fideo, ynghyd â gwaith aml-gyfryngol byw, amodau gwaith a heriau cyfoes i’r diwydiannau creadigol yng Nghymru a thu hwnt, a datblygiadau allweddol yn hanes, theori a dadansoddiad ffilm a theledu.
• Sefydlwyd yr Adran Gwleidyddiaeth Ryngwladol yn 1919 ar ddiwedd y Rhyfel Byd Cyntaf, a dyma’r adran brifysgol gyntaf o’i bath. Mae’n parhau i fod yn un o’r adrannau gwleidyddiaeth a chysylltiadau rhyngwladol mwyaf yn Ewrop, a chanddi dros 40 o staff academaidd.
• Mae’r Adran yn rhedeg Cynllun Lleoliadau Tŷ’r Cyffredin a Senedd Cymru. Mae’r lleoliadau yma’n darparu profiad gwaith gwerthfawr dros ben fydd yn ychwanegu llawer at CV myfyrwyr yn ogystal â chynnig profiad go iawn o wleidyddiaeth wrth iddo ddigwydd. Caiff myfyrwyr eu gosod gydag Aelod Seneddol yn Nhŷ’r Cyffredin, San Steffan neu gydag Aelod Senedd Cymru (Senedd Cymru, Caerdydd) am gyfnod o 4-6 wythnos yn ystod yr haf, sydd yn brofiad gwych i unrhyw fyfyriwr Gwleidyddiaeth.
• Mae'r Adran Astudiaethau Theatr, Ffilm a Theledu wedi'i lleoli mewn adeilad modern sydd â chyfleusterau ac adnoddau rhagorol ar gyfer gwaith ymarferol: tair stiwdio ymarfer, pob un ag adnoddau technegol hyblyg; dwy stiwdio fawr ag offer o safon broffesiynol a rigiau goleuadau digidol a reolir drwy ETC Congo a phaneli rheoli Strand Lighting, offer PA Yamaha a Soundcraft, systemau clyweledol Sanyo a goleuadau Strand, a dau NXAMP; yn ogystal â chyfleusterau gwisgoedd a wardrob.
• Mae ganddi gysylltiadau â phartneriaid allweddol yn y diwydiant fel BBC, S4C, BAFTA Cymru, Gŵyl Ffilm Tribeca (Efrog Newydd), Fiction Factory, Tinopolis, Gŵyl Ffilm Rhyngwladol Caeredin, Archif Sgrin a Sain Llyfrgell Genedlaethol Cymru ac Avid. Mae'r partneriaid hyn yn rhoi cyfle gwych i chi rwydweithio a chysylltu â'r diwydiant cyn graddio.

Ein Staff

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Mae holl staff academaidd yr Adran Theatr, Ffilm a Theledu yn gwneud gwaith ymchwil a/neu'n ymwneud â phrosiectau Trosglwyddo Gwybodaeth, ac mae ganddynt naill ai gymwysterau academaidd perthnasol ar lefel doethuriaeth neu brofiad proffesiynol ac arbenigedd cyfatebol.

Rhagolygon Gyrfaol

Mae graddedigion y adran wedi bod yn hynod lwyddiannus wrth ddilyn eu gyrfaoedd. Mae rhai graddedigion wedi dilyn gyrfa yn:

• y Gwasanaeth Sifil (yn enwedig y Swyddfa Dramor, Y Weinyddiaeth Amddiffyn, a’r Adran Datblygu Rhyngwladol)
• sefydliadau rhyngwladol (NATO, yr Undeb Ewropeaidd a’r Cenhedloedd Unedig)
• mudiadau anllywodraethol (Amnest Rhyngwladol, Oxfam)
• ymchwil wleidyddol, gyda chwmnïau preifat yn ogystal ag yn San Steffan, Cynulliad Cenedlaethol Cymru a Senedd Ewrop
• ymchwilio, golygu, rheoli llawr, trin camera, dylunio a chyfarwyddo ar gyfer cwmnïau ffilm a theledu
• gweithio’n llawrydd ar draws y cyfryngau
• sgriptio
• gweinyddu’r celfyddydau.

Mae eraill yn dilyn gyrfa yn:

• y lluoedd arfog
• y cyfryngau (fel newyddiadurwyr neu gyflwynwyr radio neu deledu)
• y gyfraith
• y byd addysg
• marchnata a chysylltiadau cyhoeddus
• hysbysebu
• trefnu a rhaglennu gwyliau.

Dewis poblogaidd arall yw aros mewn addysg uwch.

Sgiliau Trosglwyddadwy

Bydd astudio am radd mewn Gwleidyddiaeth yn eich arfogi ag amrywiaeth eang o sgiliau trosglwyddadwy sydd yn werthfawr iawn i gyflogwyr. Mae’r rhain yn cynnwys:

• ymchwilio a dadansoddi data
• meddwl yn greadigol a datrys problemau’n effeithlon
• gallu gweithio’n annibynnol
• trefnu a rheoli amser, gan gynnwys y gallu i gwrdd terfynau amser tynn
• mynegi syniadau a chyfathrebu gwybodaeth yn glir a threfnus, ar lafar ac yn ysgrifenedig
• hunan-gymhelliant a hunan-ddibyniaeth
• gwaith tîm - gallu trafod cysyniadau mewn grwpiau, gan drafod amrywiol syniadau a dod i gytundeb
• sgiliau technoleg gwybodaeth
• gweithio’n effeithiol mewn grŵp - datblygu, ymarfer a chynhyrchu deunydd cyfryngol a digwyddiadau byw ar y cyd ag eraill
• defnyddio sgiliau creadigol, dyfeisgar a datrys problemau mewn amryw o sefyllfaoedd
• trefnu'ch amser a defnyddio'ch sgiliau’n effeithiol
• gwrando ar gyngor beirniadol a’i ddefnyddio
• defnyddio amryw o sgiliau ac adnoddau technoleg gwybodaeth
• dangos mentergarwch wrth ddatblygu prosiectau diwylliannol.

Blwyddyn Mewn Gwaith

Mae’r Brifysgol yn rhedeg cynllun Blwyddyn mewn Gwaith, sy’n cynnig cyfle arbennig i fyfyriwyr israddedig gymryd blwyddyn allan rhwng ail a thrydedd flwyddyn y cwrs er mwyn gweithio i sefydliad yn y Derynas Unedig neu dramor. Mae’r cynllun yn rhoi profiad gwerthfawr a buddiol i fyfyrwyr, yn bersonol ac yn broffesiynol, a gall eich helpu i sefyll allan mewn marchnad waith gystadleuol iawn. Gall Gwasanaeth Gyrfaoedd y Brifysgol gynnig cyngor i chi o ran ystyried eich dewisiadau a dod o hyd i leoliad gwaith addas.

GO Wales

Gweinyddir GO Wales gan Wasanaeth Gyrfaoedd y Brifysgol, sy’n gweithio gyda busnesau lleol er mwyn creu lleoliadau gwaith cyflogedig dros gyfnod o ychydig wythnosau ar gyfer myfyrwyr. Mae’n rhoi’r cyfle ichi ennill profiad gwaith gwerthfawr a fydd yn edrych yn dda ar eich CV ac yn eich gwneud yn fwy atyniadol i ddarpar gyflogwyr.